काठमाडौँ  । काठमाडौं महानगरपालिकाका मेयर बालेन्द्र शाह(बालेन) ले नेकपा( माओवादी केन्द्र) का अध्यक्ष पुष्पकमल दाहालसँग भेटवार्ता गरेका छन् ।दाहालको सचिवालयका अनुसार शनिबार बिहान अध्यक्ष निवास खुमलटारमा मेयर शाहले भेटवार्ता गरेका हुन् । भेटमा अध्यक्ष दाहालले मेयर शाहलाई सधैंभरी साथ र सहयोग उपलब्ध गराउने बताएका छन् ।'तपाईंको जित बहुत ठूलो कुरा हो, क्रान्ति हो । पहिलेका मेयरहरू स्वतन्त्रहरू कुनै एउटा पार्टीसँग आबद्ध भएर अरु पार्टीलाई गाली गर्ने सिस्टम थियो । तर तपाईंले पहिलो पटक सबैलाई मिलाएर-सहकार्य गर्ने काम गरिरहनु भएको छ । त्यो सह्रानीय छ त्यसैले हजुरलाई हाम्रो सधैंभरी साथ र सहयोग हुनेछ,' शाहसँग दाहालले भनेका थिए ।शाहले मेयरमा निर्वाचित हुनुभन्दा अघि नेकपा एमालेका अध्यक्ष केपी शर्मा ओली र मेयरमा निर्वाचित भएपछि प्रधानमन्त्री शेरबहादुर देउवासँग भेटवार्ता गरेका थिए । उनले काठमाडौंको समस्या समाधानका लागि सबै दलसँग सहकार्य गरेर अघि बढ्ने प्रतिबद्धता जनाएका छन् ।