काठमाडौँ — विश्वव्यापी जलवायु परिवर्तनका कारण नेपालले भोगेको गम्भीर प्राकृतिक क्षति र आगामी अन्तर्राष्ट्रिय जलवायु सम्मेलन (COP) मा देशको कूटनीतिक पहलका विषयमा आज राष्ट्रिय सभाको विषयगत समितिमा गहन छलफल हुँदैछ।सङ्घीय संसद् सचिवालयका अनुसार राष्ट्रिय सभाअन्तर्गतको विकास, आर्थिक मामिला तथा सुशासन समितिको बैठक बिहीबार दिउँसो १:०० बजे सिंहदरबारस्थित भवन नम्बर २ को दोस्रो तलामा बस्ने तय भएको हो। बैठकमा जलवायु परिवर्तनको तीव्र प्रभाव, नेपालमा यसले निम्त्याएको सङ्कट र अन्तर्राष्ट्रिय मञ्चहरूमा नेपालको बलियो उपस्थिति एवं कूटनीतिक प्रवर्द्धनका एजेन्डाहरूबारे छलफल गरिनेछ।समितिले आजको बैठकमा यस क्षेत्रको विज्ञ संस्था राष्ट्रिय प्रकृति संरक्षण कोष (NTNC) लाई समेत आमन्त्रण गरेको छ। बैठकमा कोषका पदाधिकारीहरूसँग जलवायुजन्य क्षतिको वास्तविक विवरण, वैदेशिक अनुदान परिचालन र आगामी जलवायु सम्मेलनमा नेपालले उठाउनुपर्ने 'हानि र क्षति' (Loss and Damage) सम्बन्धी साझा एजेन्डाबारे रणनीतिक परामर्श गरिने सचिवालयले जनाएको छ।