काठमाडौँ ।  सरकारले लागू गर्न लागेको दैनिक इन्धन मूल्य निर्धारण प्रणालीको विरोध गर्दै पाकिस्तानभरका पेट्रोल पम्प सञ्चालकहरूले बुधबार रातिदेखि देशव्यापी रूपमा पेट्रोल पम्प बन्द गर्ने घोषणा गरेका छन्।अखिल पाकिस्तान पेट्रोल पम्प सञ्चालक संघले सरकारसँग भएको वार्ता निष्कर्षविहीन भएपछि आन्दोलनमा उत्रिने निर्णय गरेको हो। संघले दैनिक रूपमा पेट्रोलियम पदार्थको मूल्य परिवर्तन गर्ने सरकारी व्यवस्था आफूहरूलाई स्वीकार्य नभएको स्पष्ट पारेको छ।सरकारले भने अन्तर्राष्ट्रिय बजारमा हुने मूल्य परिवर्तनको प्रभाव उपभोक्तासम्म छिटो, पारदर्शी र वास्तविक रूपमा पुर्‍याउने उद्देश्यले नयाँ प्रणाली लागू गर्न लागिएको जनाएको छ। नयाँ व्यवस्थाअनुसार पछिल्ला सात दिनको अन्तर्राष्ट्रिय औसत मूल्यका आधारमा पेट्रोल र उच्च गतिको डिजेलको मूल्य दैनिक रूपमा निर्धारण गरिनेछ। शुक्रबार निर्धारण गरिएको मूल्य भने शनिबार र आइतबार पनि यथावत् रहने व्यवस्था गरिएको छ।यस प्रणालीअन्तर्गत इन्धनको मूल्य निर्धारण गर्ने अधिकार अब तेल तथा ग्यास नियामक प्राधिकरणलाई दिइनेछ। मूल्य निर्धारणका लागि प्रधानमन्त्री वा संघीय सरकारको छुट्टै स्वीकृति आवश्यक नपर्ने व्यवस्था गरिएको छ। साथै मट्टितेल र हल्का डिजेलको मूल्य पनि दैनिक रूपमा तोकिनेछ।यता पाकिस्तान पेट्रोलियम डिलर्स संघले आन्दोलनमा सहभागी हुने वा नहुने विषयमा बुधबार बस्ने कार्यसमिति बैठकबाट निर्णय गर्ने जनाएको छ। पेट्रोलियम मन्त्रालयका अधिकारीहरूले पेट्रोल पम्प सञ्चालकहरूको नाफासम्बन्धी मागप्रति सरकार सकारात्मक रहेको र सबै सरोकारवालासँग संवाद जारी रहने बताएका छन्।नयाँ आर्थिक वर्षदेखि इन्धन आयात व्यवस्थामा पनि परिवर्तन गरिएको छ। अब उच्च गतिको डिजेलको आयात सरकारी स्वामित्वको पाकिस्तान स्टेट आयलमार्फत मात्र गरिनेछ भने पेट्रोल आयातको अनुमति बजार हिस्साका आधारमा सम्बन्धित कम्पनीहरूलाई दिइनेछ। आयातसम्बन्धी दायित्व पूरा नगर्ने कम्पनीलाई नौ महिनासम्म नयाँ आयात अनुमति नदिने व्यवस्था पनि गरिएको छ।