काठमाडौं।ब्राजिलका एक न्यायाधीशले पूर्वराष्ट्रपति जेयर बोल्सोनारोलाई सामाजिक सञ्जाल प्रतिबन्ध उल्लंघन गरेको आरोपमा घरमै नजरबन्दमा राख्ने आदेश दिएका छन् ।सोमबार आएको यो निर्णयले अदालत र दक्षिणपन्थी राजनीतिज्ञ बोल्सोनारोबीचको तनावलाई झन् चर्काएको समाचार संस्था एएफपीले जनाएको छ ।पछिल्लो आदेश गत महिना सर्वोच्च अदालतले दिएको आदेशपछि आएको हो, जसमा पूर्व राष्ट्रपति बोल्सोनारोलाई इलेक्ट्रोनिक एंकल मनिटर लगाउन आदेश दिइएको थियो । यसका साथै, कारबाहीको क्रममा उनको गतिविधिमा निगरानी राख्न केही प्रतिबन्धहरू लगाइएको थियो ।बोल्सोनारोलाई सन् २०२२ मा वामपन्थी उमेदवार लुइज इनासियो लुला दा सिल्भासँगको निर्वाचनमा पराजयपछि सत्ता कब्जा गर्ने योजना बनाएको आरोप लागेको छ ।