नेकपा एकीकृत समाजवादीका अध्यक्ष माधव कुमार नेपालले पार्टीभित्र बिचारको कुनै मतभेद नरहेको बताउनुभएको छ ।सोमबार काठमाडौंमा अखिल नेपाल महिला संघ(समाजवादी) को मुखपत्र सार्वजनिक गर्दै अध्यक्ष नेपालले पार्टीको १० औं महाधिवेशन नजिकै आइरहेको अवस्थामा पार्टीभित्र बिचारको कुनै मतभेद नरहेको बताउनुभएको हो । समाजवादलाई अघि बढाउने उदेश्यका साथ पार्टी गठन भएको भन्दै अध्यक्ष नेपालले समाजवाद उन्मुख मुलुक निर्माणका लागि पार्टीले पाइला चालिरहेको धारणा राख्नुभयो ।उहाले महाविधेशनमार्फत नेपाली विशेषताको समाजवादको धारणालाई व्यवस्थीत गर्ने उल्लेख गर्नुभयो । अध्यक्ष नेपालले अहिलेको व्यवस्था र संविधान अनुसारको संरचनाबाट केहि बिकृतिहरु पैदा भएकाले त्यसलाई सुधार गर्दै अघि बढ्नुपर्ने बताउनुभयो ।उहाले आफुहरुसंग बिचार मिल्ने र सहकार्य गर्न चाहनेहरुलाई साथ साथ लिएर अघि बढ्न चाहेको र त्यसका लागि सक्दो पहलकदमी लिदै आएको जिकिर गर्नुभयो ।त्यस्तै नेकपा एकीकृत समाजवादीका सम्मानीत नेता झलनाथ खनालले नेपालको कम्युनिष्ट आन्दोलनले समाजवादलाई अघि बढाउन नसकेकाले आफ्नो पार्टीले समाजवादी कार्यक्रमलाई अघि बढाउने धारणा राख्नुभयो । उहाले महाधिवेशनमा पार्टीको बिभिन्न दस्तावेजहरुलाई परिस्कृत गर्दै पारित गर्ने दावी गर्नुभयो । उहाले सहमतिका साथ नेतृत्व निर्माण गर्नुपर्ने बताउनुभयो ।उहाले श्रमजिवी महिलाहरुसंग पार्टी पुराउन नसके कुनै पनि क्रान्ति सम्भव नरहेको बताउनुभयो ।