चितवन । पृथ्वी राजमार्गको मुग्लिननजिक पहिरो जाँदा सवारी साधनहरू अलपत्र परेका छन् । बुधवार राति आएको अविरल वर्षाका कारण दुई ठाउँमा पहिरो खस्दा सवारी आवागमन ठप्प भएको इलाका प्रहरी कार्यालय मुग्लिनका इन्स्पेक्टर सुनदिप तामाङले लोकान्तरलाई जानकारी दिए ।उनका अनुसार इच्छाकामना गाउँपालिका–४ स्थित नाग्दी खोलामा पहिरो खसेको छ ।राति साढे ११ बजे आसपासमा खसेको पहिरो ठूलो वर्षा भएपछि बिहीवार बिहान साढे ६ बजेपछि मात्रै पन्छाउन शुरू गरिएको छ । यद्यपी सो ठाउँमा अविरल वर्षा भइरहेकाले माथिबाट पहिरो खस्ने क्रम नरोकिएको इन्स्पेक्टर तामाङले जानकारी दिए ।उनले भने,‘यात्रुहरूलाई सास्ती भएको छ, हामीले पहिरो खुलाउनका लागि प्रयास गरिरहेका छौँ, पानी पनि ठूलो परिरहेकाले केही कठिन भइरहेको छ ।’उनका अनुसार पहिरो खसेपछि सो ठाउँमा पहिरो खसेपछि सवारी आवागमन ठप्प छ ।