काठमाडौँ । अमेरिकाले इरानमाथि फेरि हवाई आक्रमण गरेको अन्तर्राष्ट्रिय सञ्चारमाध्यमहरूले जनाएका छन् । दक्षिणी इरानस्थित बन्दर अब्बास आसपासका क्षेत्रमा गएराति हमला गरिएको बताइएको छ ।अन्तर्राष्ट्रिय समाचार संस्था रोयटर्सका अनुसार अमेरिकाले हर्मुज जलडमरूमध्य नजिक आफ्नो सैन्य फौज तथा व्यावसायिक जल यातायातका लागि खतरा ठानिएका इरानी सैन्य संरचनालाई लक्षित गर्दै आक्रमण गरेको हो ।एक अमेरिकी अधिकारीलाई उद्धृत गर्दै रोयटर्सले अमेरिकी सेनाले इरानबाट उडाइएका केही ड्रोनसमेत खसालेको जनाएको छ । ती ड्रोनले अमेरिकी सैन्य फौज र हर्मुज जलमार्ग हुँदै सञ्चालन हुने सीमित व्यावसायिक जहाज आवागमनमा खतरा उत्पन्न गरेको दाबी गरिएको छ ।अमेरिकी अधिकारीका अनुसार चारवटा ‘वन–वे अट्याक ड्रोन’ अर्थात् एकतर्फी आक्रमण ड्रोन खसालिएपछि पाँचौँ ड्रोन उडाउनुअघि दक्षिणी इरानको बन्दर अब्बासस्थित ड्रोन नियन्त्रण केन्द्रमा हवाई आक्रमण गरिएको थियो । उक्त क्षेत्र इरानको प्रमुख बन्दरगाहमध्ये एक मानिन्छ ।अमेरिकी अखबार द न्युयोर्क टाइम्सका अनुसार बिहीबार बिहान बन्दर अब्बास आसपास विस्फोटको आवाज सुनिएको इरानी सरकारी सञ्चारमाध्यमहरूले पनि पुष्टि गरेका छन् । इरानी पक्षले शहरको पूर्वी क्षेत्रमा तीनवटा विस्फोट भएको र वायु प्रतिरक्षा प्रणाली सक्रिय पारिएको जनाएको छ । घटनाबारे अनुसन्धान भइरहेको बताइएको छ ।यो तीन दिनभित्र अमेरिकी सेनाले गरेको दोस्रो आक्रमण हो । यसअघि सोमबार पनि अमेरिकाले आफूले रक्षात्मक कारबाही गरेको भन्दै बारुदी सुरुङ बिछ्याउन खोजिएका डुंगा र मिसाइल प्रक्षेपणस्थललाई निशाना बनाएको दाबी गरेको थियो ।तर इरानले अमेरिकी कारबाहीलाई दुई देशबीचको कमजोर युद्धविराम उल्लंघन भएको भन्दै विरोध जनाएको छ ।